如果你想試用呢個日韓爆紅減肥法，可以由以下幾個步驟開始：
1. 由一餐開始
唔需要一日三餐即刻全部換手，可以先揀晚餐或你最容易食得太快嗰一餐，練習用非慣用手進食。
2. 配合細啖慢嚼
刻意將每啖食物變細啲，放入口之後至少咀嚼 15–20 下先吞落肚，令「慢食減肥」效果更明顯。
3. 食飯時專心食飯
盡量避免邊滑手機、邊追劇，因為分心會削弱大腦對飽足感的感應；既然你已經用非慣用手，索性當一個「正念進食」練習。
4. 一次唔成功唔緊要
好多營養師都提過，有人用呢個方法會「食到好忟憎」，甚至想放棄。
你可以開始只用非慣用手「夾餸」，但仍用慣用手拎碗／飲湯，適應咗先再全程換手，降低挫敗感。
注意事項：唔係人人啱用，更唔係魔法減肥
雖然聽落好吸引，但專家都提醒：「非慣用手減肥法」唔係魔法，亦唔代表你可以毫無節制咁食。
· 如果你本身飲食已經好清淡，食量唔算大，純粹想塑形，效果未必好顯著
· 如果你仍然日日飲含糖飲品、食大量甜品、高脂炸物、宵夜，再點樣慢食都可能熱量爆晒錶。
· 對非常冇耐性、食嘢一定要好快嘅人，有營養師直言：「可能會食到生氣，之後乾脆改食布丁、雪糕等易入口嘅高熱量食物」，反而得不償失。
所以，最理想做法係將非慣用手減肥法，當成一個「幫你放慢進食速度」的小工具，再配合：
· 以原型食物、蔬菜、優質蛋白為主的飲食
· 控制甜飲、精製澱粉、零食及酒精攝取
· 配合適量帶氧運動或日常多走路，提升整體能量消耗
非慣用手減肥法適合邊啲人？
較適合：
· 食飯速度特別快、成日食到頂肚先停手的人。
· 工作忙、暫時未必可以安排固定運動時間，想先由飲食行為入手的人。
· 容易邊做其他嘢邊無意識食嘢（例如追劇狂食零食）的人。
較唔適合／要小心：
· 有手部／上肢關節、神經問題，換手可能會增加不適。
· 有進食障礙、極端節食經歷，應優先諮詢醫生或營養師。
· 完全冇耐性、極易煩躁，練幾次就放棄，反而造成更多壓力
